陳祉璁同學（左）同埋一班隊友展示佢哋嘅製成品「錄音鞋」。夏家朗攝
浸信會天虹小學實行「下午不上課」計劃已經一個學年，噚日就搞咗「DreamStarter啟夢者計劃」嘅成品展示會，校長朱子穎話下晝嘅時間完全由小朋友主導，最重要嘅係小朋友對活動嘅參與度同熱情。佢又話作為大人應該做好畀小朋友輸同跌嘅準備，「小朋友有夢唔係去打擊佢哋話唔得，而係去幫佢哋去得」，所以佢隨機將全校學生分成28組，畀機會佢哋一齊實現夢想。
「錄音鞋」助小朋友多講嘢
「Trendy Tracks」組員陳祉璁話，佢哋嘅夢想係希望小朋友可以講多啲嘢，所以裝咗個錄音零件喺隻鞋度，咁就可以聽番錄音嚟學講嘢，而揀鞋係因為鞋夠輕。佢好開心咁指住成品話︰「呢啲圖案同埋掛珠都喺我哋整，外面買唔到，不過原本嘅（白鞋）係喺淘寶買番嚟。」
